Etiket: kurtce

Esnafên Bazara Taxê, ji bo ku daxwaz û pêşniyarên xwe parve bikin, serdana hevşaredarên me kirin. Di dema serdanê de esnafan berfireh pirsgirêkên avahiya Bazara Taxê anîn ziman.

Hevşaredarên me Sevîm Bîçîcî û Kadrî Esen, bi baldarî li esnafên ku pirsgirêkên avahiya Bazara Taxê anîn ziman guhdarî kirin û qeyt kirin. Piştî serdanê pirsgirêk bi vî awayî hatin rêzkirin:

-Banê hesinî ji bo pêşîlêgirtina dilopbûnê li Bazara Taxê

-Rakirina firoşkarên gerok ên ku li ber deriyê bazarê tiştan difiroşin

-Paqijkirina otoparqa bazarê û vekirina wê ji bo bikaranînê

-Nûkirina rampaya astengdara ya li ber deriyê bazarê û ji nû ve rastkirina pêpelokên têketinê

-Paşdexistina tiştên esnafên hundirê bazarê bi qasî 1 mîtrokî

Hevserokên me diyar kirin ku piştî nirxandina daxwazên esnafan, ew ê bi lez û bi bandor bersivê bidin û got ku dê di demeke herî kurt de çareserî ji pirsgirêkan re bê dîtin.

Ev hevdîtin, armanc dike ku bi danîna têkiliyeke nêzîktir bi esnafan re pirsgirêk bên çareserkirin û kalîteya xizmetê bê bilindkirin.

Hevşaredarên me Sevîm Bîçîcî û Kadrî Esen, xebatên ku ji aliyê Midûriyeta Karê Fenê ve li Parqa Rindêxan, taxên Yenîşehîr û Baxçelîevlerê hatine kirin, li cih lêkolîn kirin.

Li Taxa Yenîşehîrê sererastkirina refûjê

Midûriyeta Karê Fenê ya me ku xebatên xwe li seranserê navenda navçeyê didomîne, li ser Kolana Amedê ya Taxa Yenîşehîrê, di navbera du sîteyan de dest bi xebatên sererastkirina refûjê kir. Hat dîtin ku li cihê ku dê refûj bê çêkirin kevirên sînorê hatine raxistin û ji bo çêkirina qada kesk axa pêwîst hatiye anîn.

Hevşaredarên me Sevîm Bîçîcî û Kadrî Esen ku xebatan li cîh şopandin, diyar kirin ku bi vê serastkirinê ew armanc dikin ku qada vala ya heyî bikin qadeke kesk û ji aliyê estetîkê ve baştir bikin.

Hemwelatiyên ku ji xebatan kêfxweş bûn, spasiya xwe ji hevserokên me re gotin û girîngî û bandora xizmetên hatî kirin anîn ziman. Ev xebatên ku Midûriyeta Karê Fenê ya me dimeşîne, armanc dike ku nihêrina giştî ya navçeyê û kalîteya jiyanê bilind bike.

Midûriyeta Karên Fenê ya Şaredariya me, bê rawestandin xebatên bingehîn û çêkirina rêyan li seranserê navçeyê didomîne. Di vê çarçoveyê de, li Taxa Yenîşehîrê, kuçeya 725an, xebata raxistina kevirên kilitkirî hat kirin.

Hevşaredarên me Sevîm Bîçîcî û Kadrî Esen, ji bo ku xebatan ji nêz ve bibînin, derketin qadê û li gel karkeran bûn. Di dema lêkolînê de hevşaredarên me bi xwe jî tevlî karkeran bûn û kevirên parqe danîn. Herwiha bi hemwelatiyan re sohbet kirin û li cih kalîteya karên hatiye kirin û pêwîstiyên wan nirxandin.

Gelê taxê ku ji xebatan kêfxweş bûn, spasiya xwe ji hevşaredarên me re anîn û balê kişandin ser girîngiya xizmetên hatine kirin. Hevşaradarên me, li gorî paşxuriyên hemwelatiyan, diyar kirin ku divê xebat bê pêşxistin û baştir kirin.

Piştî çavdêriyên xwe, hevşaredarên me ji qada xebatê veqetiyan û gotin ku xizmetên şaredariya me yên li seranserê navçeyê dê bidomin û ew ê hewl bidin ku bi awayekî herî baş bersiva daxwazên gel bidin.

Ev xebatên bi vî rengî ku şaredariya me dike, armanc dike ku kalîteya jiyanê li seranserê navçeyê bilind bike û welatî jî piştevaniya vê xebatê dikin û jê kêfxweş in.

Bernameya “Şeva Dengbêjan” ku ji aliyê şaredariya me ve li Parqa Rindêxan hat organîzekirin, bi eleqeyeke zêde ya farqîniyan hat lidarxistin. Hevşaredara me Sevîm Bîçîcî, nûnerên Rêxistina Navçeya Farqînê ya Partiya DEM’ê, rêveberên Rêxistina Navçeya Farqînê ya CHP’ê û nûnerên gelek rêxistinên sivîl beşdarî şeva dengbêjan bûn.

Dengbêj Şerîf Çoşûk, Dengbêj Mehmet Siddik Eryilmaz, Dengbêj Siddik Baran û Dengbêj Serkan Gezîcî tevlî “Şeva Dengbêjan” ku gel eleqeyeke mezin nîşan da bûn û bi stranên xwe gel çoşandin.

Hevşaredara me Sevîm Bîçîcî di şevê de axivî û destnîşan kir ku wê xebatên wan ên çandî berdewam bikin û ji bo parastina çanda herêmî wê di vî warî de xebatên xwe zêdetir bikin.

Şaredariya me, li navçeyê dest bi tevgereke berfireh a paqijiyê kir. Ev kampanyaya paqijiyê ku dê nêzî 3 mehan bidome, dê bi panoyên reklaman û broşurên bi kurmancî, zazakî û tirkî were destekkirin û her wiha ji bo kampanyayê filmeke kurt hatiye amadekirin. Kampanya armanc dike ku hişmendiya jîngehê li navçeyê zêde bike û cihên jiyanê paqijtir bike.

Hevserokên Şaredariya me Sevim Biçici û Kadri Esen, ku li ber şaredariya me kom bûn û cilên ku li ser wan bi dirûşma “Paqij bike û bide paqijkirin” nivîsandî li xwe kiribûn, bi Hevserokê DEM Partiya Navçeya Farqînê Nazmî Ezer û rêveberên partiyê, endamên meclisa me, Serokê CHP’ê yê Navçeya Farqînê Îhsan Kizilkan, endamên Egîtîm Senê, nûnerên Odeyên Pîşesazî û dikandar, karkerên paqijiyê û welatiyan re li navçeyê kampanya paqijiyê dan destpêkirin.

Hevserokên şaredariya me û şandeya bi wan re ku ji ber avahiya şaredariyê dest bi paqijiyê kirin û li ser Cadeya Karabehulbey paqijî kirin û heta Cadeya Gazî ya navenda navçeyê hatin, li vir daxuyanî dan.

Di daxuyaniyê de Hevserokê Şaredariya me Kadrî Esen got: “Em wek şaredarî bi dirûşma ‘Paqij bike û bide paqijkirin’ dest bi kampanyaya paqijiyê kirin. Em gazî hemû gelê xwe dikin; di mijara paqijiyê de piştgiriya me bikin da ku em ji siberoja xwe re, ji zarokên xwe re bajarekî paqij û bi tendurist bihêlin. Kampanyaya me îro dest pê kir û dê 3 mehan bidome. Em ê hefteyê carekê dîsa bi hev re li cihekî cuda paqij bikin û bidin paqijkirin û em dixwazin ku têgihiştina paqijiyê pêk were.”

Hevseroka me Sevim Biçici jî spasiya hemû kesên ku ku di kampanyayê de xebat kirine kir û got: “Faqrîn welatê me ye. Cihê ku em lê dijîn e. Em ê paqij bikin û qirêj nekin. Ji ber vê yekê me kampanyaya xwe bi dirûşma ‘Paqij bike û bide paqijkirin”’ dest pê kir.” Bîçîcî di berdewamiya axaftina xwe de bang li jin û ciwanan kir û got: “Em dora xwe paqij bikin û xwedî li navçeya xwe derkevin.”

Di çarçoveya kampanyayê de, ji bo zêdekirina hişmendiya paqijiyê gelek amûr hatin amadekirin. Fîlm, panoyên reklaman û broşurên ku bi kurmancî, zazakî û tirkî hatine amadekirin, armanc dikin ku gel agahdar bike û hişmend bike. Şaredariya me, dê bi rêya van amûran gel li ser girîngiya paqijiyê agahdar bike û wan teşwîq bike ku beşdarî xebatên paqijiyê bibin.

Ev kampanyaya berfireh a paqijiyê ya şaredariya me, ne tenê dê paqijiya giştî ya navçeyê pêk bîne, her wiha armanc dike ku hişmendiya jîngehê zêde bike û di civakê de hesteke hevpar a berpirsiyariyê ava bike.